Ágætu félagsmenn,
Vakin er athygli á neðangreindri ráðstefnu Landsbjargar um öryggi og slysavarnir. Á ráðstefnunni verða öryggismál í ferðaþjónustu áberandi að vanda og eru félagsmenn hvattir til að skrá sig leiks.
|
Miðvikudaginn 6. október birti Friðrik Rafnsson, formaður Leiðsagnar-stéttarfélags leiðsögumanna, eftirfarandi grein í Fréttablaðinu.
Flestir Íslendingar hafa skiljanlega sjaldan eða aldrei notið þjónustu íslenskra leiðsögumanna hér heima, en hafa væntanlega séð þeim bregða fyrir klædda skrautlegum útivistarfatnaði malandi með hóp túrista á eftir sér á helstu ferðamannastöðum, haldandi á hljóðnema í rútu sem troðfull er af ferðamönnum eða leiðandi hópa fólks um þéttbýli jafnt sem fjöll og firnindi.
Hvernig sem því er háttað er þarna á ferðinni framlínufólkið í ferðaþjónustunni því faglærðir leiðsögumenn, sem aukinheldur að stærstum hluta háskólamenntaðir, eru það fólk sem sér um að framkvæma skipulagðar ferðir og ber einna mesta ábyrgð á því að stór hluti ferðamanna sem hingað koma njóti þess að ferðast um landið öruggir og snúi aftur ánægðir og margs vísari um land og þjóð.
Augu og eyru
Vissulega felst starf okkar leiðsögumanna í að miðla þekkingu á landi okkar, náttúru, sögu og menningu. Halda athygli farþeganna klukkutímum, stundum dögum saman, fræða þá og skemmta þeim enda eru þeir hingað komnir til að njóta lífsins. Þess vegna þarf góður leiðsögumaður að rækta í sér sagnamanninn, þá skemmtilegu íslensku hefð, kunna að segja frá. En hann þarf líka að kunna að „lesa salinn“ eins og leikarar kalla það, skynja væntingar farþeganna og laga sig að þeim. Leiðsögumaður sem fer til dæmis Gullhring með breskar unglingsstúlkur einn daginn og franska eldri borgara næsta dag matreiðir sama fróðleik augljóslega ekki á sama hátt ofan í svo ólíka hópa. Þess vegna eru eyrun ekki síður mikilvæg fyrir góðan leiðsögumann en munnurinn.
Menningarlæsi
Málið flækist enn þegar leiðsögumaður er með fólk af mörgum þjóðernum í sama hópnum. Yfirleitt er þá notast við það tungumál sem flestir sem hingað koma tala að einhverju marki, ensku, en sú kunnátta er stundum ekki burðug meðal allra farþega. Þá skiptir lipurð leiðsögumannsins í mannlegum samskiptum enn meira máli. Og það mætti jafnvel taka þetta enn lengra og segja að þá skipti menningarlæsi leiðsögumannsins höfuðmáli.
Menningarlæsi er flókið hugtak, en í stuttu máli gerir sá eða sú sem er læs á menningu og trúarbrögð annarra sér grein fyrir helstu siðum og venjum sem einkenna hana og virðir það í hvívetna. Annars getur viðkomandi lent í því að særa eða móðga viðkomandi sárlega. Menningarheimar Bandaríkjamanna, Indverja, Japana, Marokkóbúa og Frakka eru til dæmis gerólíkir, borðsiðir og persónumörk mismunandi. Leiðsögumenn verða að kunna skil á þeim og þjóna þeim samkvæmt því og það er ekki alltaf auðvelt, einkum þegar hópar eru blandaðir. Aðferðin sem ég held að flestir leiðsögumenn beiti þegar þeir eru með farþega frá gerólíkum menningarheimum er því sú að feta vandaðan meðalveg í ferðunum og reyna að prjóna við fróðleikinn með einstaka farþegum í stoppum eða þegar færi gefst og tryggja þannig að allir séu ánægðir.
Öryggi og gleði á norðurhjara veraldar
Við heimafólkið kippum okkur ekkert upp við það þótt veðrið breytist í sífellu, jörð skjálfi og eldfjöll gjósi. Mörgu ferðafólki sem hingað kemur bregður hins vegar verulega í brún við það eitt að aka í gegnum ógnvekjandi hraunbreiðu í misjöfnu veðri frá Keflavíkurvelli til Reykjavíkur og spyr sig ráðvillt hvert það sé eignlega komið. Er það virkilega komið þangað sem það vildi fara, í ævintýraferð á eldfjalla- og jöklaeyju á hjara veraldar þar sem náttúruöflin eru ógnvekjandi? Þá sem endranær eru faglærðir og vel þjálfaðir leiðsögumenn lykilfólkið í ferðaþjónustunni. Þeir eru brúarsmiðir milli menningarheima, trygging fyrir því að erlendu gestirnir okkar njóti Íslandsferðarinnar í botn, átti sig á því að þótt landið geti verið ógnvekjandi sé það líka fallegt, heillandi og spennandi. Mesta umbun leiðsögumannsins felst því í að hjálpa fólki að höndla þessar gríðarlegu andstæður, njóta þeirra og kveðja það loks örlítið ráðvillt en glatt og stolt yfir að hafa öðlast nýja og óviðjafnanlega lífsreynslu.
Höfundur er formaður Leiðsagnar, stéttarfélags leiðsögumanna
|
|
|
|
|
Kæra leiðsögufólk
Eitt af því sem þarf að efla innan Leiðsagnar er aukið upplýsingaflæði. Ég hyggst því senda reglulega pistla til að upplýsa
ykkur um gang mála, en jafnframt er ykkur velkomið að senda fyrirspurnir, kvartanir, hrós eða hvers kyns ábendingar á
formaðThis email address is being protected from spambots. You need JavaScript enabled to view it. um hvaðeina sem ykkur liggur á hjarta, og mun ég reyna að svara þeim eftir bestu getu.
Ég vil byrja því að þakka fyrir það traust sem félagsmenn sýndu mér á aðalfundi félagsins 8. júní síðastliðinn þegar ég var
kosinn formaður félagsins. Það var vissulega afar mjótt á mununum, aðeins eitt atkvæði skildi að okkur Óskar Kristjánsson,
mótframbjóðanda minn og fyrrum gjaldkera félagsins. Ég vil þakka honum drengilega umræðu í aðdraganda kosninganna og
vona að við fáum að njóta krafta hans áfram í þágu félagsins.
Nýja stjórnin hefur lent í nokkrum áföllum á þessum fyrstu mánuðum; Júlíus Freyr Theodórsson sagði af sér sökum anna og
var Snorri Steinn Sigurðsson kjörinn varamaður í hans stað. Fyrir rúmum tveimur vikum tilkynnti ritari félagsins, Jakob S.
Jónsson, skyndilega afsögn sína úr stjórn, trúnaðarráði og kjaranefnd, en ákvað síðan að draga hana til baka þar sem ekki
var um neinn málefnalegan ágreining að ræða, og var það samþykkt á fundi stjórnar og trúnaðarráðs í gær, mánudaginn
6.september.
Stjórn stéttarfélagsins er því þannig skipuð nú: Friðrik Rafnsson formaður, Snorri Steinn Sigurðsson varaformaður, Valva
Árnadóttir gjaldkeri, Jakob S. Jónsson ritari og Harpa Björnsdóttir meðstjórnandi. Frá aðalfundi hefur stjórn fundað fimm sinnum
til að ræða og ákveða ýmis mál. Meðal þeirra má nefna skipulag á upprifjunarnámskeiði um skyndihjálp á vegum Rauða
krossins, samning um leigu á nýju skrifstofuhúsnæði að Stórhöfða 29, útgáfu kynningarefnis fyrir nýja leiðsögumenn, kynningu
á leiðsögumannsstarfinu í Verkmenntaskóla Akureyrar og ýmis önnur mál sem koma fram í fundargerðum á vef Leiðsagnar.
Þegar stjórnarskipti áttu sér stað í júní var óvissan um sumarið algjör vegna covid-19, en þegar losað var um hömlur í byrjun
júlí tók ferðaþjónustan snöggan kipp og undanfarna mánuði virðast leiðsögumenn hafa haft nóg að gera, og sumir gott betur
en það, einkum ökuleiðsögumenn. Ég hef heyrt það og séð á ferðum mínum í sumar að leiðsögumenn voru fegnir og glaðir að
geta loks aftur farið að vinna við það sem þeim finnst skemmtilegra og meira gefandi en flest annað. Fljótlega fóru þó að
heyrast þær raddir að smitvarnir í rútum, á veitingastöðum og hótelmóttökum væru ekki alltaf sem skyldi. Til að bregðast við
því skrifaði ég grein í Fréttablaðið miðvikudaginn 4. ágúst undir yfirskriftinni Framlínufólkið í ferðaþjónustunni" þar sem segir
m.a. "Þrátt fyrir frábæran árangur í sóttvörnum og bólusetningu hvíldi samt skuggi veirunnar yfir öllum sem umgengust okkar
erlendu gesti og gerir það nú sem aldrei fyrr þegar hún virðist enn og aftur komin í veldisvöxt. Ég leyfi mér að fullyrða að
langflest ferðaþjónustufyrirtæki gera allt sem í þeirra valdi stendur til að koma í veg fyrir smit farþega og starfsmanna; spritta,
nota grímur, hólfaskipta og uppfræða ferðafólkið. Það breytir því ekki að leiðsögumenn eru eðli starfsins samkvæmt í
langmestri og nánustu samskiptunum við okkar erlendu gesti og eru þar af leiðandi í stöðugri hættu að smitast. Við það bætist
að ráðningasamband leiðsögumanna og ferðaþjónustufyrirtækja er stundum ekki nógu skýrt og veikindaréttur óljós og ég veit
dæmi þess að þaulvanir leiðsögumenn hafi afþakkað verkefni af þessum ástæðum. Kæruleysi eða reddingar við núverandi
aðstæður er ekki boðlegt." Nú, rúmum mánuði seinna, er þetta nánast óbreytt. Förum varlega og verum fagleg, það er allra
hagur.
Nokkuð hefur borið á því að erlendir aðilar hafi tekið upp fyrri háttu, rútufyrirtæki hafi að sögn verið með ferðir þar sem
réttindalausir ökuleiðsögumenn hafi verið að störfum og að erlendir hópstjórar hafi gengið í störf íslenskra, faglærðra
leiðsögumanna. Slíkt er ekki boðlegt og mun Leiðsögn þrýsta á að tekið verði á þessu í samvinnu við SA, SAF og þar til bær
yfirvöld.
Nú þegar ferðaþjónustan er (vonandi) að taka verulega við sér hefur Leiðsögn fengið ábendingar um vaxandi áherslu
fyrirtækja að semja við leiðsögumenn um verktöku í stað þess að vera launþegar, og bjóða verktakaálag sem er fjarri því að
standa undir launatengdum greiðslum. Auk þess er þannig ráðningasamband óboðlegt fyrir sérfræðinga eins og leiðsögumenn.
Til að auðvelda leiðsögumönnum að átta sig á því hvað verktaka gefur raunverulega í laun, verður sérhönnuð reiknivél
bráðlega verða sett inn á innri vef félagsins þar sem fólk getur slegið inn ýmsar launaforsendur og séð hvernig það kemur út.
Það mun auðvelda fólki mjög vinnuna og getur orðið mikilvægt hjálpartæki í komandi kjarasamningalotu.
Eins og við vitum er starf leiðsögumannsins afar skemmtilegt og gefandi. En því fylgir líka mikil ábyrgð og það skilar sér ekki
nægilega vel í þeim launum sem við fáum greidd fyrir okkar vinnu. Til að breyta því þurfum við stöðugt að sinna starfi okkar
af metnaði, fagmennsku og alúð gagnvart farþegunum okkar og tryggja að ferðaþjónustufyrirtækin, vinnuveitendur okkar,
standi sig í stykkinu í hvívetna. Ennfremur þurfum við leiðsögumenn að stilla betur saman strengi, skiptast á skoðunum og
komast að sameiginlegri niðurstöðu sem þokar okkur áfram og upp. Það er sameiginlegur hagur okkar allra.
Reykjavík, 7. september 2021.
Friðrik Rafnsson, formaður Leiðsagnar - stéttarfélags leiðsögumanna
Fréttaflutningur hefur leitt í ljós að töluverðar líkur eru á að COVID-19 smit geti haft neikvæð áhrif á rekstur fyrirtækja á næstu vikum og mánuðum á meðan COVID-19 gengur yfir samfélagið, með stýrðum hætti eins og kostur er, þar til hjarðónæmi er náð meðal þjóðarinnar.
Ný afstaðin ríkisstjórnarfundur staðfestir mat sóttvarnaryfirvalda að ekki séu aðrar leiðir færar þar sem bólusettir einstaklingar geta verið smitberar eins og aðrir þrátt fyrir að bólusetningar veiti mjög góða vörn gegn alvarlegum veikindum.
Því er ljóst að framundan er tímabil sem getur markast af óvissu og truflunum á starfsemi fyrirtækja í tengslum við sóttkví og því mikilvægt að fyrirtæki hugi að og uppfæri viðbragðsáætlanir sínar til að tryggja áfallaþol og órofinn rekstur.
Samtök ferðaþjónustunnar, Ferðamálastofa og Leiðsögn- félag leiðsögumanna vilja því í sameiningu benda ferðaþjónustufyrirtækjum á eftirfarandi:
Sem ein af grunnstoðum samfélagsins er ferðaþjónusta mikilvæg öllum landsmönnum. Ekki aðeins njóta landsmenn þjónustu hennar t.d. yfir sumartímann heldur er ferðaþjónusta undirstaða atvinnulífs víða á landsbyggðinni. Samtal ferðaþjónustunnar við hagaðila á komandi misserum verður við þessar aðstæður mikilvægara en nokkru sinni fyrr. Með samstilltu átaki munum við komast á þann stað að geta lifað, og starfað, með veirunni.
Rekstraraðilar í ferðaþjónustu geta sótt nánari upplýsingar og ráðgjöf til Samtaka ferðaþjónustunnar, Ferðamálastofu, Almannavarna og Embættis landlæknis.
Eftirfarandi grein eftir Friðrik Rafnsson, formann Leiðsagnar – stéttarfélags leiðsögumanna, birtist í Fréttablaðinu miðvikudaginn 4. ágúst.
Það er táknrænt að leiðsögumaður skuli ævinlega leiða hóp ferðamanna jafnt í þéttbýli sem á fjöllum, sitja fremst í rútum, undir stýri í ökuleiðsögn. Leiðsögumaðurinn er ábyrgur fyrir framkvæmd ferðar eins og hún var seld farþegum, velferð þeirra og öryggi í samvinnu við bílstjóra ef svo ber undir. Í stuttu máli, þá heldur leiðsögumaðurinn einatt um alla þræði ferðarinnar, sér um að allt gangi smurt og að farþegar geti notið landsins okkar góða öryggir og áhyggjulausir.
Það ríkti mikil gleði og tilhlökkun meðal leiðsögumanna þegar ferðamenn gátu aftur farið að streyma til landsins fyrr í sumar, en þá hafði ferðaþjónustan sem kunnugt er verið algerlega lömuð í hálft annað ár vegna Covíð-19. Leiðsögumenn voru svolítið eins og kálfar að vori, rétt eins og farþegarnir, og fögnuðu því mjög að geta aftur farið að vinna og fræða erlendu gestina um íslenska náttúru, sögu og menningu.
Þrátt fyrir frábæran árangur í sóttvörnum og bólusetningu hvíldi samt skuggi veirunnar yfir öllum sem umgengust okkar erlendu gesti og gerir það nú sem aldrei fyrr þegar hún virðist enn og aftur komin í veldisvöxt. Ég leyfi mér að fullyrða að langflest ferðaþjónustufyrirtæki gera allt sem í þeirra valdi stendur til að koma í veg fyrir smit farþega og starfsmanna, spritta, nota grímur, hólfaskipta og uppfræða ferðafólkið. Það breytir því ekki að leiðsögumenn eru eðli starfsins samkvæmt í langmestri og nánustu samskiptunum við okkar erlendu gesti og eru þar af leiðandi í stöðugri hættu að smitast. Við það bætist að ráðningasamband leiðsögumanna og ferðaþjónustufyrirtækja er stundum ekki nógu skýrt og veikindaréttur óljós og ég veit dæmi þess að þaulvanir leiðsögumenn hafi afþakkað verkefni af þessum ástæðum. Kæruleysi eða reddingar við núverandi aðstæður er ekki boðlegt.
Endurreisn ferðaþjónustunnar er lykillinn að uppbyggingu efnahagslífisins út um allt land. Við þurfum að gera það faglega en varlega, annars slær í bakseglin. Við höfum mörg tromp á hendi, öryggi, náttúrufegurð, sífellt betri innviði og vel menntað fagfólk. Takist öllum sem í ferðaþjónustunni að spila vel og skynsamlega úr þessari viðkvæmu stöðu verður framtíð ferðaþjónustunnar björt og góð. Ég leyfi mér fyrir hönd íslenskra leiðsögumanna að lofa því að við munum gera allt sem í okkar valdi stendur til að svo megi verða.
Skrifstofa Leiðsagnar verður lokuð vegna sumarleyfa frá 19. júlí til og með 6. ágúst. Skrifstofan opnar aftur mánudaginn 9. ágúst kl. 13:00. Ef erindið er áríðandi vinsamlegast sendið tölvupóst á formann Leiðsagnar á netfangið This email address is being protected from spambots. You need JavaScript enabled to view it. eða hafið samband í síma 772 5559.
Nýkjörin stjórn stéttarfélagsins Leiðsagnar kom saman á sínum öðrum fundi í dag þar sem meðal annars var tilkynnt opinberlega að Júlíus Freyr Theodórsson, varaformaður Leiðsagnar, hefði ákveðið að segja af sér embætti vegna anna. Það þýðir að Snorri Steinn Sigurðsson, sem hlaut flest atkvæði nýrra stjórnarmanna á aðalfundi þann 9.júní er þar með lýðæðislega kjörinn næsti varamaður, Harpa Björnsóttir, kemur inn sem nýr aðalmaður.
Þar með jafnast kynjahlutfallið í stjórn félagsins úr 20% í 40%, en það hefur verið nokkuð réttilega verið til umræðu innan félagsins. Ég vil sem formaður félagsins þakka Júlíusi kærlega fyrir frábært samstarf og vonast til að eiga hann að í ýmsum mikilvægum málum og ég veit að svo er enda áttum við góðan og sólríkan fund á Akureyri nýverið þar sem hann heimilaði mér sem formanni félagsins að birta afsagnarbréf hans í heild á vef félagsins. Sjá hér fyrir neðan.
Frðrik Rafnsson, formaður stéttarfélagsins Leiðsagnar.
"Til þeirra er málið kann að varða.
Ég undirritaður, Júlíus Freyr Theodórsson kt:210777-4319 segi mig hér með úr stjórn Leiðsagnar, félags leiðsögumanna af persónulegum ástæðum.
Það hefur verið mér mikil heiður að sitja í stjórn á þessum skrýtnu tímum, að mínu mati hefur stjórn á undanförnu ári lyft grettistaki í uppbyggingu félagsins til framtíðar og það er mín trú að sú verði áfram raunin til framtíðar.
Ég lýsi jafnframt yfir fullu trausti á núverandi stjórn og hvet þau áfram til góðra verka og vona frá dýpstu hjartarótum að áfram verði haldið því góða starfi sem að átt hefur sér stað undanfarið ár.
Akureyri 25.6.2021
Júlíus Freyr Theodórsson"
Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra skipaði sl. haust starfshóp um menntun og starfsþjálfun leiðsögumanna. Starfshópnum var ætlað að skoða hvort og þá hvernig hægt væri að efla menntun og starfsþjálfun leiðsögumanna með áherslu á neytendavernd, náttúruvernd og öryggi. Hópnum var ætlað að líta til erlendra fyrirmynda, s.s. frá Nýja-Sjálandi, við mótun mögulegra tillagna um mismunandi kröfur til mismunandi gerðar leiðsagnar og leggja til grundvallar evrópska staðla um leiðsögunám og hæfi í tungumálum, sem og reglugerð um viðurkenningu á faglegri menntun og hæfi til starfa.
Í starfshópnum sátu fulltrúar Ferðamálastofu, sem jafnframt var formaður hópsins, Hæfniseturs ferðaþjónustunnar, Leiðsagnar – stéttarfélags leiðsögumanna, mennta- og menningarmálaráðuneytis, Samtaka ferðaþjónustunnar og umhverfis- og auðlindaráðuneytis. Sjá https://www.stjornarradid.is/efst-a-baugi/frettir/stok-frett/2021/06/22/Starfshopur-um-leidsogumenn-skilar-skyrslu-til-radherra/
Skrifstofa Leiðsagnar verður lokuð vikuna 5.-9. júlí vegna sumarleyfa. Ef erindið er brýnt, vinsamlegast hafið samband við formann Leiðsagnar á netfangið formadur(hja)touristguide.is eða í síma 772 559.
Í lok maí útskrifuðust 27 leiðsögumenn frá Leiðsöguskóla Íslands, 19 leiðsögumenn ferðafólks og 8 gönguleiðsögumenn. Eins og oftast áður eru flestir með ensku sem kjörmál en ferðaskipuleggjendur sem bjóða upp á ferðir fyrir þýskumælandi ferðamenn gleðjast væntanlega yfir því að leiðsögumenn sem tala þýsku fjölgar um fimm.
Skólahald var vissulega ekki alltaf með hefðbundnu sniði í vetur en bæði nemendur og kennarar voru sérlega samstarfsfúsir og sýndu mikla aðlögunarhæfni við erfiðar aðstæður, það er óhætt að segja að það er mikill kostur fyrir leiðsögumenn að búa yfir báðum þessum kostum. Nemendur sýndu í vetur að þeir búa yfir ýmsum hæfileikum og að það er mikill fengur fyrir ferðaþjónustuna á Íslandi að fá þau til starfa.
Vala Hafstað flutti ávarp fyrir hönd nemenda við útskriftina. Vala hefur skemmt samnemendum sínum með bæði frumsömdum og þýddum ljóðum á ensku í vetur en hún yrkir líka á íslensku og lauk ávarpinu með þessu fallega ljóði sem segir gefur til kynna hvernig andinn var í hópnum:
Nú flýgur á braut þessi flokkur
með fjaðraþyt – þökk fyrir okkur.
En höldum samt hópinn að vanda;
það hressa mun sálu og anda.
Leiðsögn óskar nýjum leiðsögumönnum til hamingju og hvetur alla til að ganga í félagið og taka þátt í störfum þess.
Aukaaðalfundur Leiðsagnar – stéttarfélags leiðsögumanna var haldinn 8. júní. Á fundinum var kosið í stjórn félagsins og helstu trúnaðastörf sem svo segir:
Aðalstjórn:
Friðrik Rafnsson
Júlíus Freyr Theódórsson
Snorri Steinn Sigurðsson
Valva Árnadóttir
Jakob S. Jónsson
Varamenn:
Harpa Björnsdóttir
Hjörtur Howser
Sigrún Pálsdóttir
Guðný Margrét Emilsdóttir
Ný í stjórn stjórn verða því Snorri, Valva og Jakob. Júlíus er að fara inn á sitt annað ár.
Snorri og Valva eru kjörin til tveggja ára en Jakob tekur sæti Friðriks Rafnssonar sem átti eitt ár eftir af kjörtíma sínum.
Trúnaðarráð
Vegna kjörs í stjórn og varastjórn var sjálfkjörið í 12 sæti aðalmanna og varamanna. Kosið var um sex aðalmenn og sex varamenn.
Eftirfarandi hlutu kjör sem aðalmenn:
Áslaug J. Marinósdóttir.
Birna Imsland.
Hildur Bjarnason.
Indriði H. Þorláksson.
Kári Jónasson.
Þórhildur Sigurðardóttir.
Kosið var á milli þeirra Aldísar Aðalbjarnardóttur og Hildar Bjarnason sem fengið höfðu jafnmörg atkvæði. Hildur var kjörin sem aðalmaður.
Varamenn eru:
Aldís Aðalbjarnardóttir.
Guðni Gunnarsson.
Jónína Birna Halldórsdóttir.
Pétur Gunnarsson.
Sigurður Magnússon.
Stefán Arngrímsson.
Fastanefndir og aðrar trúnaðarstöður
Sjálfkjörið var í fastanefndir og aðrar trúnaðarstöður.
Alþjóðanefnd: Pétur Gunnarsson.
Fagráð: Indriði H. Þorláksson.
Fræðslunefnd: Guðný Margrét Emilsdóttir.
Ritnefnd: Sigurður Magnússon.
Kosning stjórnar sjúkrasjóðs félagsins
Fimm voru í framboði og voru kosnir þrír aðalmenn og tveir varamenn.
Þessi hlutu kosningu sem aðalmenn:
Pétur Gauti Valgeirsson.
Ragnheiður Ármannsdóttir.
Vilborg Anna Björnsdóttir.
Varamenn:
Lovísa Birgisdóttir.
Þorsteinn Svavar McKinstry.
Kosning tveggja félagskjörinna skoðunarmanna reikninga til tveggja ára
Sjálfkjörið var í þessar tvær stöður. Skoðunarmenn reikninga verða áfram þeir Snorri Ingason og Bergur Álfþórsson.
Öryggi farþega er lykilatriði í starfi leiðsögumanna. Því efna Leiðsögn og Rauði krossinn til skyndihjálparnámskeiða í þessum mánuði. Í boði eru tvö 4 klst skyndihjálparnámskeið og velja þátttakendur annað hvort 23. eða 24. júní.
Hvort námskeið stendur frá kl 18:00-22:00. Námskeiðið verður haldið í sal Rauða krossins í Hafnarfirði, Strandgötu 24 220 Hafnarfirði.
Hérna er skráningahlekkur fyrir námskeiðið 23. júní http://skraning.raudikrossinn.is/namskeid?CourseId=a0N6M00000QEWPJ
Og hérna er skráningahlekkur fyrir námskeiðið 24. júní http://skraning.raudikrossinn.is/namskeid?CourseId=a0N6M00000QEWPO
Þátttakendur geta skráð sig sjálfir á námskeið þann dag sem hentar þeim betur.
Eftir námskeiðið geta þátttakendur sótt rafrænt skyndihjálparskírteini á skyndihjalp.is-https://skyndihjalp.is/skirteinid-mitt/
Ekki er boðið upp á veitingar á námskeiðinu og því eru þátttakendur vinsamlegast beðnir um að taka með sér nesti.
Nánari lýsing:Skyndihjálp 4 klukkustundir
Námskeiðið er ætlað öllum þeim sem vilja læra eða rifja upp grunnatriði skyndihjálpar og sálræns stuðnings og öðlast lágmarksfærni í að veita slösuðum eða veikum aðstoð í bráðatilfellum. Stutt og gott námskeið fyrir alla.
Lengd: 4 klukkustundir með hléum (fjöldi kennslustunda 5)
Markmið: Að þátttakendur öðlist grunnfærni í að beita skyndihjálp og sálrænum stuðningi í neyðartilvikum.
Viðfangsefni:Kynning; hvað er skyndihjálp? Undirstöðuatriði; streita í neyðartilfellum, tilfinningaleg viðbrögð eftir að hafa veitt skyndihjálp, sálrænn stuðningur og að forðast sýkingar.Fjögur skref skyndihjálpar; tryggja öryggi á vettvangi, meta ástand slasaðra eða sjúkra, sækja hjálp og veita skyndihjálp.Grunnendurlífgun og sjálfvirkt hjartastuð; að athuga viðbrögð, að opna öndunarveg, að athuga öndun, hjartahnoð og blástursaðferð, sjálfvirkt hjartastuð (AED), endurlífgunarkeðjan, hliðarlega og losun aðskotahlutar úr öndunarvegi.Skyndihjálp; stutt umfjöllun um innvortis- og útvortis blæðingar, bruni, höfuðhögg, brjóstverkur (hjartaáfall), bráðaofnæmi og heilablóðfall.
Nýkjörin stjórn Leiðsagnar - félags leiðsögumanna hittist á sínum fyrsta fundi fimmtudaginn 10. júní til að skipta með sér verkum. Auk formanns, Friðriks Rafnssonar, skipa stjórnina Júlíus Freyr Theodórsson, varaformaður, Valva Árnadóttir, gjaldkeri, Jakob S. Jónsson, ritari og Snorri Steinn Sigurðsson. Varamenn eru Harpa Björnsdóttir, Hjörtur Howser, Sigrún Pálsdóttir og Guðný Margrét Emilsdóttir.
