Leiðsögn
Stórhöfða 29, 110 Reykjavík
Kt. 510772-0249
Opið /Open
13:00 -16:00, mán.- fim.
13:00 -16:00, Mon. - Thur.
Lokað á föstudögum / Friday closed
Sími / Tel
+354 588 8670
Kynningar frambjóðenda til formanns og stjórnar
Eftirfarandi frambjóðendur til formanns og stjórnar Leiðsagnar 2024 vilja kynna sig.
Lista yfir alla frambjóðendur má finna í frétt sem var áður birt hér á heimasíðunni.
Halldór Kolbeins
Eftir hvatningu frá félögum í Leiðsögn hef ég ákveðið að bjóða mig fram til formanns félagsins, sem kjörinn verður fyrir komandi aðalfund í apríl.
Nú er liðið tæpt eitt og hálft ár frá því að ég fór að hafa afskipti af Leiðsögn, fyrst sem fulltrúi í samninganefnd og síðan í stjórn félagsins. Í þeim störfum hef ég gert mér far um að hlusta á raddir fólks og unnið talsvert að bættum kjörum félagsmanna. Þessi tími hefur reynst mér mjög dýrmætur og gefið ómetanlega innsýn í starfsumhverfi félagsmanna í Leiðsögn. Þar vil ég sérstaklega nefna tímann við gerð síðustu kjarasamninga og þau forréttindi sem ég naut, að fá að kynnast því góða fólki sem kom að allri þeirri vinnu sem þar átti sér stað. Jafnframt hef ég verið svo lánsamur að fá tíma til að kynnast og umgangast það góða fólk sem starfar innan félagsins og á það eitt sameiginlegt að vilja standa með félagi sínu.
Undanfarin misseri hafa samt verið vægast sagt stormasöm í félaginu. Það allt er að baki og ég ætla mér ekki að dvelja í fortíðinni, hún er liðin og kemur ekki aftur.
Ég þeirrar skoðunar að félagið okkar komi til með sigla sterkara út úr þeirri stöðu sem við erum í í dag vegna þess að þegar á reynir fara menn að hugsa út fyrir rammann og leita leiða til að sjá til lands með hagsmuni allra félagsmanna að leiðarljósi.
Eitt af því sem rætt hefur verið um er náið samstarf eða jafnvel sameining við önnur stéttarfélög og í því samhengi hefur VR oftast verið nefnt. Forsenda fyrir því að hægt sé að hefja slíkar samningaumleitanir er að næsti aðalfundur veiti stjórn félagsins skýrt umboð til þess. Verði það niðurstaðan er ég tilbúinn í þá vegferð og hef reyndar talað fyrir því að slíkt verði skoðað í fullri alvöru. Það er þó skýrt að endanlega ákvörðun um samstarf eða sameiningu verður tekin að lokinni ítarlegri kynningu og þá í allsherjaratkvæðagreiðslu meðal félagsmanna Leiðsagnar.
Ég sé ótvíræð tækifæri í sameiningu við önnur félög en geri mér grein fyrir að sú vegferð gerist í áföngum. Núverandi stærð félagsins er mjög óhagstæð rekstrareining og það eitt og sér er næg ástæða til að skoða sameiningu við aðra.
Þessa dagana er mikið rætt um að byggja upp innviði ferðaþjónustunnar hér á landi og þar verðum við að halda því á lofti að leiðsögumenn eru einn af mikilvægustu burðarstólpum ferðaþjónustunnar. Þess vegna þurfum við leiðsögumenn að standa sameinaðir á bak við sterkt stéttarfélag til að standa vörð um leiðsögustarfið sem einn af hornsteinum ferðaþjónustunnar.
Það er ánægjulegt að sjá hversu margir félagar hafa gert sér grein fyrir mikilvægi þess að takast á við þau verkefni sem fyrir okkur liggja með því að bjóða sig fram til stjórnarsetu. Þar eru á ferðinni einstaklingar með mikla þekkingu og reynslu sem nýtast mun félaginu vel.
Nái ég kjöri mun ég halda áfram að leggja mig fram um að hlusta á leiðsögumenn og vinna þannig að samráði og bættum kjörum félagsmanna. Sterkt stéttarfélag sameinaðra félagsmanna er forsenda árangurs í hagsmunabaráttu leiðsögumanna. Þar eigum við líka kost á að marka okkar spor í framþróun ferðaþjónustu á landsvísu, ef vel er að staðið.
Sterkt félag samhentra félagsmanna getur haft mikil áhrif á það hvernig regluverk í starfsumhverfi okkar þróast á næstu árum. Þar eigum við að gera okkur gildandi með uppbyggilegum tillögum og skýrri sýn. Þannig verðum við rödd sem tekið er eftir og hefur áhrif.
Að lokum hvet ég alla félagsmenn til þess að nýta sér kosningarétt sinn og greiða atkvæði í kosningum til stjórnar Leiðsagnar. Allir þeir sem hafa kosningarétt fá sendan tengil í tölvupósti til að taka þátt í rafrænni kosningu.
Þeim sem ákveða að styðja mig í embætti formanns þakka ég stuðninginn. Þeir sem óska eftir því að setja sig í samband við mig geta gert það á:
This email address is being protected from spambots. You need JavaScript enabled to view it.
facebook.com/halldor.kolbeins
Þór Bínó Friðriksson
Ég heiti Þór Bínó og útskrifaðist sem leiðsögumaður út Ferðamálaskóla Íslands árið 2013.
Eftir útskrift hef ég aðallega sinnt ökuleiðsögn, gönguleiðsögn sem og almennri leiðsögn sem “sitjandi” leiðsögumaður í rútu.
Ég hef hug á að bjóða mig fram til formanns Leiðsagnar þar sem mér þykir mikilvægt að við einbeitum okkur að vinna saman að eftirfarandi atriðum:
- Leiðsögn verði sameiningartákn allra sem starfa við leiðsögn á Íslandi.
- Efla félagið með því að ná inn þeim aðilum sem starfa við leiðsögn.
- Skýra stefnu á kjara, vinnuverndar og réttindamál til framtíðar.
- Kanna á faglegan hátt hvernig hagsmunum félaga leiðsagnar er best borgið, eitt og sér, samvinna eða sameining við annað stéttarfélag eða eitthvað allt annað.
Björn Júlíus Grímsson
Heil og sæl ég er 3ja barna faðir og hef starfað sem leiðsögumaður að aðalstarfi í að verða 8 ár og vonandi get ég klárað starfsævina á þessum skemmtilega og gefandi vettvangi.
Ég útskrifaðist úr MK 2017. Ég hef starfað innan björgunarsveitar og ungmennafélags, eins hef ég verið trúnaðarmaður, öryggistrúnaðarmaður ásamt því að vera í samninganefndum. Ég hef komið víða við á mínum starfsferli og hef alltaf reynt að vera virkur meðlimur í mínu nærsamfélagi sem og í mínu starfsumhverfi.
Markmið mín með þessu framboði eru fyrst og fremst að tryggja starfsumhverfi leiðsögumanna og búa til einingu sem kemur til með að verja okkur af krafti þegar kemur að kjarabrotum og launaþjófnaði.
Hugmyndir mínar ríma nokkuð vel við hugmyndir flestra þeirra sem eru í framboði svo það er tilhlökkunarefni að byrja þá vegferð að byggja upp traust og gott félag hvort heldur sem einingu innan stærra stéttafélags eða að byggja Leiðsögn upp til vegs og virðingar kjósi félagsmenn það.
Félagið á sér langa og góða sögu. Þó undanfarin misseri hafi reynst erfið held ég að með nýju fólki í brúnni sé góður grundvöllur til að halda merkjum félagsins hátt á lofti og efla um leið starfsstéttina.
Það er löngu kominn tími á að sameina alla leiðsögumenn undir einn og sama hatt og standa þannig sterkari að vígi þegar kemur að kjarasamningum og einnig vera sterkt afl þegar kemur að því að ná athygli ráðamanna eða fjölmiðla í þeim málefnum sem snúa að okkar starfsstétt.
Ég vona innilega að fólk nýti atkvæðisrétt sinn og hafi trú á málefninu, hafi trú á félaginu og að því sé betur borgið með nýju fólki í brúnni.
Hello everyone, I’m a father of 3 and began my work in guiding roughly 8 years ago and hope to continue contributing to this fun and meaningful field until retirement.
I graduated from MK in 2017 and have been involved with Icelandic Search and Rescue, various youth organizations, served as a safety shop steward, as well as negotiated department contracts on behalf of large groups of employees. I have had my hands on a wide variety of jobs in my day and have always done my best to be as active in both the social aspect of my professional community as well as the workplace.
My goals in running for this position are, first and foremost, to ensure a positive and reliable work environment for guides. I believe the best way to do this is by forming a cohesive governing unit that is powerful enough to advocate for us in matters of wage disputes and ensure that our contracts are respected and upheld. As I am sure many of us can agree, I look forward to starting the journey of building up a trustworthy and dependable union, whether it be part of a larger established body or as a new, stronger independent one, should that be the wish of the majority vote.
The union has a long and, in large part, positive history; Though lately it has been tumultuous and uncertain in fulfilling its purpose to protect and empower its members. I believe that with new representatives and ideas at the helm, there is an amazing foundation on which to raise the flag of this union high for our diverse and talented guiding community.
It is long overdue for all guides to unite as one in order to stand up stronger in matters of general negotiations and the laws and contracts that dictate both our opportunity to be treated fairly, as well as our long-term success and sustainability in the trade which we are all so passionate about.
I sincerely hope that people use their right to vote and have faith in this cause and in this union, knowing that re-structuring is the only positive way for us all to move forward.
Daði Hrólfsson
Ég heiti Daði Hrólfsson og hef starfað við leiðsögn síðan árið 2016, að mestu leiti við ökuleiðsögn en einnig farið aðeins upp á jökul og setið smá í stórri rútu. Undanfarin ár hef ég að mestu verið í hringferðum.
Ég er fæddur 1963 í Vestmannaeyjum og eins og margir aðrir leiðsögumenn þá er ég með menntun utan leiðsagnar og útskrifaðist ég úr Samvinnuskólanum á Bifröst og Fiskvinnsluskólanum á síðustu öld. Ég starfaði lengi við sjávarútveg, fyrstu árin á sjó frá Vestmannaeyjum og síðan sem verkstjóri og framleiðslustjóri í frystihúsum. M.a. starfaði ég 10 ár í Afríku og Asíu við sjávarútveg þar sem ég upplifði mjög ólíka menningu og hugarfar. Eftir ár mín erlendis jókst áhugi minn á náttúru íslands verulega og finnst mér það vera mjög gefandi að vinna við ferðaþjónustu.
Kjaramál, kjaramál og kjaramál eru þau mál sem mér finnst vera mikilvægust hjá Leiðsögn. Ég er í samninganefnd Leiðsagnar (síðan í nóvember 2023) og hef kynnst aðeins því starfi sem þar fer fram og hef átt góð samskipti við alla þá sem ég hef kynnst innan Leiðsagnar. Ég tel að okkar stærsta kjarabót felist í því að fyrirtæki í ferðaþjónustu faru öll að lögum og borgi laun samkvæmt kjarasamningum. Undirboð, meðallaun og annar subbuskapur íslenskra fyrirtækja sem stjórnað er af íslendingum er einfaldlega ekki boðlegur og á meira skylt við yfirstandandi fréttir af mansalsmálum heldur en góða viðskiptahætti. Síðan þarf íslenskur ferðaiðnaður að fara að átta sig á því að meðalaldur leiðsögumanna er frekar hár og vantar betri kjör til að yngra fólk geri leiðsögn að aðalstarfi.
Ég styð heils hugar það að skoða frekara samstarf við VR.
Daníel Perez Eðvarsson
Ég heiti Daníel Perez Eðvarðsson (1992) og starfa að fullu sem leiðsögumaður og bílstjóri í hinum ýmsu verkefnum, allan ársins hring. Ég er með BA próf í myndlist og MA próf í listkennslu og leyfisbréf. Þar að auki næstum lokið listfræði BA með spænsku. Ég tala reiprennandi spænsku ofan á enskukunnáttu mína og hef lokið einni önn í Leiðsöguskóla MK, og hef ekki áhuga á að ljúka námi, þaðan. Að svo stöddu. Ég hef starfað í íslenskri ferðaþjónustu frá því 2017 og þar áður í sundlaugum, baðstöðum, þjónustustörfum, matreiðslu, kennslu, umönnun og fleira. Ég hef verið búsettur til náms í Panamaborg, Brussel, Stokkhólmi, Suður Hollandi og Englandi. Ég hef verið búsettur á suður Spáni þar að auki í Granada og faðir minn er þaðan. Báðir foreldrar mínir (móðir og stjúpfaðir) eru leiðsögumenn, og framhaldsskólakennarar. Ég hef mikla innsýn í menntamál landsins sem og innsýn í ferðaþjónustu og líf fólksins í henni, af öllum þjóðernum og uppruna. Ég hef unnið high-end og lowend. Og elska að keyra rútu og halda kjafti. Listin að leiðsegja er að kunna að þegja.
Góðar stundir og hlakka til að kynnast ykkur. Ég styð breytingar.
Þetta stéttarfélag (ef svo má kalla) verður að fara STRAX inn í stærra stéttarfélag.
Guðbjörn Guðbjörnsson
Ég heiti Guðbjörn Guðbjörnsson og er fæddur í Reykjavík en ólst upp í Kópavogi og í Garðabæ. Ég hef starfað við leiðsögn í nær 40 ár eða síðan 1984 og þá Ítalíu en síðar í Þýskalandi, Austurríki og Frakklandi. Síðan 2010 hef ég síðan starfað við leiðsögn innanlands og þá á þýsku fyrir Þjóðverja, Austurríkismenn og Svisslendinga. Ég hef nær eingöngu verið í hringferðum en einnig tekið nokkra daga við að leiðsegja farþegum ferðamannaskipa. Ég hef aðallega unnið fyrir þær ferðaskrifstofur sem sérhæfa sig í móttöku Þjóðverja.
Ég er stúdent úr Verzlunarskóla Íslands 1982 en eftir það fór ég í óperusöngnám og útskrifaðist með burtfararpróf 1986. Þaðan lá leiðin til Austur-Berlínar í framhaldsnám, sem ég lauk þó frá Óperustúdíói Óperunnar í Zürich í Sviss 1989. Eftir nám var ég ráðinn við óperuhúsin í Trier, Kíl og Hamborg og starfaði og bjó þar alls í 12 ár. Ég tók próf frá ferðamálaskóla í Þýskalandi (1997). Eftir það vann ég í 2 ár á ferðaskrifstofunni Terra Nova og þá bæði innanlandsdeild og síðar sem sölustjóri utanlandsferða. Eftir þetta var ég ráðinn til Tollstjórans á Suðurnesjum. Ég hef starfað síðan 1998 í tollgæslunni og síðustu 20 árin sem aðstoðar- og yfirtollvörður og starfa nú sem deildarstjóri endurskoðunardeildar Skattsins. Ég lauk prófi frá Tollskóla ríkisins 1999. Ég lauk BA-prófi í þýsku og ensku 2006 og meistaragráðu í opinberri stjórnsýslu (MPA) árið 2008 frá Háskóla Íslands. Um þessar mundir stunda ég nám í Leiðsöguskólanum í Kópavogi.
Ég hef verið í félagsstörfum allt frá því á unglingsárunum þegar ég var viðriðinn ungmennafélagshreyfinguna. Síðar var ég í stjórn Nemendafélags Verzlunarskólans. Þá var ég í stjórn Óperunnar í Kíl fyrir hönd starfsmanna (1990-1992). Ég var vara- og formaður stéttarfélags Tollvarða í 5 ár (2004-2009) og hef fjórum sinnum verið í forsvari fyrir samninganefnd félagsins við fjármálaráðuneytið og í stofnanasamningum við tollstjóra/Ríkisskattstjóra. Ég var aftur kosinn formaður Tollvarðafélagsins árið 2021 og er það enn. Ég stýri þar með auðvitað kjarasamningagerð félagsins. Á árunum 2006-2009 sat ég í stjórn BSRB. Síðan 2021 sit ég í formannaráði BSRB. Ég var endurkjörinn formaður Tollvarðafélagsins 2022.
Ég hef því víðtæka reynslu af því að stýra og sitja í stjórn stéttarfélags með allri þeirri ábyrgð og skyldum sem því fylgja. Ég legg áherslu á góð samskipti við þá sem ég er að semja við (fjármálaráðuneytið/ríkisskattstjóra). Það hefur sýnt sig að ég er lipur samningamaður en þó fastur fyrir þegar á því þarf að halda. Í störfum mínum í endurskoðunardeild Skattsins úrskurða ég á stjórnsýslustigi í tolla- og skattamálum. Og sem stjórnsýslufræðingur og starfsmaður hins opinbera sem millistjórnandi þekki ég til stjórnsýslulaga. Einnig er ég vel inn í því er snýr að lagalegri hlið þegar kemur að stéttarfélögum.
Það er að mörgu að huga hjá okkar stéttarfélagi Leiðsögn. Þar er auðvitað fyrst að nefna launin, sem að mínu mati eru í engu samræmi við menntun, tungumálakunnáttu og yfirgripsmikla þekkingu þeirra sem þetta starf stunda. Að auki er ábyrgð leiðsögumanna gríðarleg og starfið krefst þess að viðkomandi séu mjög góðir í mannlegum samskiptum auk þess að vera skemmtilegir og alúðlegir. Vinnuaðstaða leiðsögumanna mætti vera betri. Fyrir slíkt fólk sem okkur er ekki hægt að greiða smánarleg laun, því annars er það nú svo fólk staldrar stutt við í starfinu og öðrum dettur hreinlega ekki í hug að leggja þessa skemmtilegu vinnu fyrir sig.
Ég styð heils hugar frekara samstarf við VR.
Gunnar Bragi Ólason
Ég heiti Gunnar Bragi Ólason, faglærður leiðsögumaður, en ég útskrifaðist sem gönguleiðsögumaður frá MK 2014. Eftir að námi lauk starfaði ég sem gönguleiðsögumaður, með hléi frá 2017 til 2021. Undanfarin ár hef ég að mestu starfað sem ökuleiðsögumaður.
Minn bakgrunnur er doktorsgráða í efnafræði, þar sem ég hef m.a. unnið sem millistjórnandi við rekstur rannsóknastofa. Af störfum mínum er ég þekktur fyrir að vera frekar talnaglöggur maður og tel ég að þeir hæfileikar mínir geti komið að góðu gagni í stjórn félagsins.
Ég tel að það sem við leiðsögumenn þurfum að einbeita okkur að; eru öryggismál, tryggingarmál, keðjuábyrgð, félagsleg undirboð, launaþjófnaður og sameining leiðsögumanna, sem starfa í greininni. Það gerum við best með því að efla félagið, þannig að allir sem vinna við leiðsögn, upplifi sig velkomna.
Til frekari útskýringa, þá tel ég að við þurfum að búa við öruggi í vinnu okkar og við eigum að geta hætt við ferð eða stöðvað, ef öryggi okkar er stefnt í voða, án þess að við gjöldum fyrir það á einn eða annan hátt. Við eigum líka að vera með nauðsynleg öryggistæki, eins og gasmæla þegar við vinnum nálægt virkum eldstöðvum s.s. Reykjanes og Kötlu.
Varðandi tryggingamál, þá þarf það að vera alveg klárt, að við séum með starfsábyrgðartryggingu gagnvart málshöfðun. Keðjuábyrgð er í raun framhald af þessu, en við verðum að vinna í því að hver sem skipuleggur ferð, á að bera ábyrgð á ferðaáætluninni, því við eigum ekki sem leiðsögumenn eða bílstjórar að sitja upp með svartapéturinn, vegna þess að náttstaður er í 14 tíma fjarlægð frá upphafsstað! Eða að boðið er upp á fulla dagskrá, þar sem farið er í dagsferð og svo norðurljósaleit um kvöldið og svo fulla dagsskrá næsta dag, þar sem farið er af stað innan hvíldartíma!
Mörg okkar starfa sem verktakar og ég hef tekið eftir því að oftar en ekki eru menn að þiggja laun, sem eru lægri en umsaminn taxti, þegar raunlaun hafa verið reiknuð. Þetta er í raun félagslegt undirboð og þar að auki greiða fæstir þeirra sem eru verktakar, stéttafélagsgjald til Leiðsagnar.
Innan okkar greinar, er nokkuð algengt að menn séu á svokölluðu jafnaðarkaupi. Slíkt er í raun ekki löglegt, nema þá að því að þau dekki að fullu umsamda taxta að öllu leiti, því okkar taxtar eru lágmarkslaun. Þannig að ef mönnum er greitt þetta jafnaðarkaup, en vinna oftar en ekki um helgar, þá er kaupið undir taxta, nema jafnaðarkaupið sé jafnt yfirvinnukaupi og að aldrei sé unnið á stórhátíðardögum. Einnig hef ég heyrt af því, að sum fyrirtæki séu ekki að greiða yfirvinnukaup eins og það á að vera, þ.e. 68% ofan á dagvinnukaup heldur sé yfirvinnutaxtinn 30% sem er í raun vaktaálagið.
Einungis lítill hluti starfandi leiðsögumanna er í stéttafélaginu, þessu þurfum við að breyta. Stéttarfélagið þarf að vera opið öllum sem starfa í greininni, óháð hvaða menntun viðkomandi hafa. Sundrungin sem hefur fylgt félaginu nánast frá upphafi, verður að taka enda, því án samstöðu náum við ekki nauðsynlegum málum fram.
Hildur Þöll Ágústsdóttir
Ég heiti Hildur Þöll Ágústsdóttir, útskrifaðist sem leiðsögumaður úr Ferðamálaskóla Íslands 2013.
Ég býð mig fram í stjórn Leiðsagnar, hvatinn til þess er afar einfaldur. Ég vil sjá Leiðsögn verða félag allra leiðsögumanna og að það verði það vogarafl sem það getur orðið. Að Leiðsögn verði virkt afl til að standa vörð um kaup, kjör og réttindi. Að félagið verði virkt í að standa vörð um hagsmuni félaga sinna. Stjórn Leiðsagnar láti skoða kosti þess og galla að gera verksamning við annað verkalýðsfélag, sameiningu við annað félag, skoði alla þá möguleika sem í boði eru og eru hagfelldir fyrir alla félagsmenn.
Jens Ruminy
Sælir félagar,
ég býð mig fram til kosningar til stjórnarsetu á n.k. aðalfundi, þann 4.4.2024.
Ég heiti Jens Ruminy og hef verið virkur leiðsögumaður frá sumri 1998. Flestir hafa séð mig kannski einhvern tímann á förnum vegi.
Ég hef verið virkur í félagi leiðsögumanna, nú Leiðsögn, í u.þ.b. 20 ár og talað fyrir mikilvægi gæða í starfi okkar og að félagið opni sig fyrir nýjum hugmyndum um hvernig við leiðsögumenn stöndum á vinnumarkaði.
Einnig finnst mér mikilvægt að okkar stéttarfélag bjóði sambærilega kosti og flest önnur félög eins og aðgengi að sumarhúsum og þess háttar.
Nú er kominn skriður í þessum málum með umræðu um inngöngu í stærra félag og langar mig að bjóða krafta mína fram í þeirri vinnu að ganga í VR, þó að ég sé einnig opinn fyrir öðrum lausnum ef þær lofa svipuðum möguleikum. Mikilvægast í öllum þessum málum finnst mér að félagsmenn séu vel upplýstir um helstu stefnumál og fái tækifæri til að tjá sína skoðanir. Verst hefur gengið þeim stjórnum sem ætluðu að bæta haginn okkar en gleymdu að hafa samráð við félagið.
Óskar Grímur Kristjánsson
Óskar Grímur Kristjánsson heiti ég, en ég er faglærður leiðsögumaður frá MK, með 10 ára reynslu í faginu. Upphaflega Eskfirðingur, en bjó í rúman aldarfjórðung erlendis, þar sem ég starfaði lengst af sem stjórnunar- og rekstarráðgjafi í Evrópu og Afríku.
Vegna brennandi áhuga míns fyrir hagsmunabaráttu leiðsögumanna, hef ég undanfarin 5 ár, sinnt ýmsum trúnaðarstörfum m.a. setið í stjórn Leiðsagnar, fyrst sem varamaður, en síðar sem gjaldkeri. Við stofnun hagsmunafélags ökuleiðsögumanna, var ég kjörin sem formaður félagsins og er nú á öðru ári sem formaður þess.
Ég hef óbilandi trú á því, að við leiðsögumenn getum fundið farsælan farveg fyrir okkar hagsmunabaráttu og það eru góðir hlutir að gerast. Sú staðreynd að hagsmunafélög fjalla- og ökuleiðsögumanna vinna nú náið með stéttarfélaginu boðar gott fyrir framtíðina.
Þar sem ég trúi því, að við sem félag þurfum fyrst að tryggja samstöðu leiðsögumanna, áður en við hefjum samtal við önnur stéttarfélög um sameiningu, þá vil ég leggja mitt framlag í formi reynslu og þekkingar á hagsmunabaráttu leiðsögumanna á vogarskálarnar og vinna þannig að framgangi þess mikilvæga verkefnis.