Ágætu fagmenntuðu leiðsögumenn!

 

IGC (Inter Nordic Guide Club) eru samtök norrænna leiðsögumanna sem Leiðsögn hefur verið aðili að um áratuga skeið. Á þessum vettvangi skiptast norrænir leiðsögumenn á skoðunum, fræðslu og reynslu.

Aðalfundur samtakanna verður haldinn í Kungälv í Suður Svíþjóð að þessu sinni þann 29.apríl 2023.

Skráning þarf að fara fram í síðasta lagi 4.apríl nk. Við fengum aukafrest til skráningar og notum okkur það endilega. Allar frekari upplýsingar og skráning:

Sigrún R Ragnarsdóttir s: 852 2252

This email address is being protected from spambots. You need JavaScript enabled to view it.

Jórunn Rothenborg s: 696 1196

This email address is being protected from spambots. You need JavaScript enabled to view it.

Dagskrá fylgir hér og kynnisferðir sem boðið er uppá um bæði land og menningu Suður-Svíþjóðar:

 

Aðalfundur og ráðstefna IGC í Kungälv 29. og 30.apríl 2023

Aðalfundur og ráðstefna verða haldin á Hótel Fars Hatt í Kungälv í suðvestur Svíþjóð.

Skráning til 4.apríl 2023

Dagskrá

Laugardagur 29.apríl 2023

08.00-08.45 Skráning á fundinn, Hotell Fars Hatt.

09.00-10.00 Setning á Bohus fästning sem var vígð á 14.öld og hefur í gegnum aldirnar staðið af sér allar tilraunir til að hertaka staðinn. Sjáumst þar.

10.30-13.00 Aðalfundur á Hotell Fars Hatt og umræður.

13.00 Hádegisverðarhlaðborð.

14.00-17.00 Kungälv/Vestursvíþjóð séð frá norsku, dönsku og sænsku sjónarhorni. Við byrjum á miðöldum.

Kaffipása – hátíðarbakkelsi í tilefni 400 ára afmælis Gautaborgar

19.00 Kvöldverður á Hotell Fars Hatt

Sunnudagur 30.apríl 2023

8.30 Rútuferð til Marstrand með ljósmyndastoppum, til baka gegnum Kungälv til Surte og Gautaborgar með stuttri leiðsöguferð í miðbæ Gautaborgar

13.00 Hádegisverður á skipinu Viking sem smíðað var í Kaupmannahöfn

14.30 Valborgarmessuhátíðarhöld í Gautaborg eða heimsókn á safn eða búðarölt!

18.00 Kvöldverður í Gautaborg fyrir þá sem vilja borða saman – (ekki innifalið)

Chalmarscortegen

Gisting á Hotell Fars Hatt því ný ævintýri bíða á mánudagsmorgun

Innifalið í Setning, Aðalfundur, tveir hádegisverðir, kaffi, einn kvöldverður. skráningargjaldi: Rútuferð, aðgangseyrir, fyrirlestrar, leiðsögn og skemmtilegur hópur Norrænna leiðsögumanna

Verð SEK 1585

Bankaupplýsingar

Bankgiro 271-9417

IBAN: SE8450000000056121009977

BIC: ESSESESS

Banki: SEB 10640 Stockholm

Upplýsingar:

Þeir sem koma með flugi til Landwetter: það er ódýra að kaupa miða í flugrútu á netinu eða á flugstöðinni en að kaupa þá í rútunni.

Í Gautaborg er farið út á Nils Ericson Terminalen (endastöð). Þaðan er hægt að taka rútu nr X4 sem ekur til Kungälv. Lestin frá Kastrup kemur líka á Nils Ericson Terminlen.

Rúta X4 fer til Kungälv, þar gildir það sama, ódýrara að kaupa miða á netinu eða á lestarstöðinni.

Þegar til Kungälv er komið er farið út á stoppistöð Fars Hatt.

Vinsamlegast látið vita ef þið hafið sérþarfir varðandi mat eða annað.

FERÐIR Í BOÐI

28.apríl Heilsdagsferð

Haldið er frá Kungälv og hringferðin hefst með því að aka með vesturströndinni. Ekið í áttina að Noregi og Stenungsund og að Tjörn þar sem er myndastopp í stórkostlegu útsýni. Haldið áfram yfir ána Orust og að Tanum, þar sem eru klettaristur sem teljast til menningararfs Svía. Ekið með ströndinni við Bullaren, Strömstad, Kosteröarna farið hjá Grebbested og Fjällbacka þar sem glæpasögudrottningin Camilla Läckberg ólst upp. Önnur fræg kona, leikkonan Ingrid Bergman eyddi gjarna sumrunum í þessu þorpi. Áfram til Kungshamn og að Nordens Ark þar sem snæddur verður góður kvöldverður áður en haldið verður aftur til Kungälv.

Innifalið: Rúta, hádegisverður, kaffi, kvöldverður, leiðsögn. Aðgangseyrir í boði hvers staðar.

VERÐ SEK 695 á mann

 

1.og 2.maí tveggja daga ferð

1.maí

Ekið frá Kungälv upp með Göta-ánni til miðaldabæjarins Lödöse og litið við á safninu þar. Síðan haldið áfram til Lilla Edet og Trollhättan þar sem skoðaðir verða skipastigar og haldið til Husaby kirkju þar sem fyrsti kristni svíakonungurinn Olaf Skötkonung lét skírast. Hér erum við líka á slóðum Arn fyrir þá sem þekkja bækur Jan Guillou um munkinn sem varð riddari og alla þá miðaldasögu sem þar er. Áfram er haldið yfir Kinnekulle á móts við Billingen og áfram í Forshemskirkju sem er eina norræna kirkjan sem helguð er hinni heilögu gröf í Jerúsalem. Svo er það Varnhem þar sem Marie ferðamálastjóri hittir hópinn og segir frá umhverfinu. Ferðin þennan daginn endar í Lundsbrunn á Hotell Lundsbrunn.

Kl. 19.00 er 2ja rétta kvöldverður á hótelinu.

2.maí

Haldið áfram áleiðis til Skara, komið við á Vastergötlandsafni og síðan er næsta stopp við Hornborgasjön þar sem trönurnar koma við á hverju ári allt að 20 þúsund fuglar. Ef heppnin er með gætum við séð einhverja. Enn fylgjum við Arn og Ceciliu og sjáum nú klausturrústirnar þar sem Cecilia eyddi 20 árum meðan hún beið eftir að Arn kæmi til baka.

Í Fallköping verður stoppað og þar tekur ostameistarinn hópinn með í ostakjallarann og upplýsir hvernig osturinn er gerður. Siðan verður haldið áleiðis til baka og vonandi gefst tími til að fara á rómaða útsýnisstaði.

Innifalið: Gisting, rúta, tveir hádegisverðir, 4x kaffi og meðlæti, aðgangseyrir, 2ja rétta kvöldverður, gisting í einsmannsherbergjum, morgunverður og leiðsögn (þú borgar mat, hótel og rútu).

Ath! við þurfum að lágmarki 30 þátttakendur f. þetta verð

Tími: mánudagur 1.maí og þriðjudagur 2.maí VERÐ SEK 1765 / á mann

 

Nánari upplýsingar

 

Tungumál eru öryggistæki – þankabrot í tilefni af Alþjóðadegi leiðsögumanna

Í dag fagna leiðsögumenn um heim allan deginum sínum. Alþjóðasamband leiðsögumanna hefur nefnilega fagnað degi leiðsögumanna 21. febrúar ár hvert frá árinu 1990. Tilgangurinn með þessum degi er að vekja athygli á mikilvægi leiðsögumanna um heim allan en það felst einkum í fimm meginatriðum: fræðslu, skemmtun, öryggi, náttúruvernd og neytendavernd.

Um það bil fjórir af hverjum tíu ferðamönnum sem koma hingað til lands fara í skipulagðar ferðir, allt frá dagsferðum og upp í tvær vikur. Leiðsögumenn gegna því lykilhlutverki í upplifun ferðamanna af landi og þjóð. Í starfi sínu hafa þeir ekki einungis áhrif á upplifun og öryggi ferðamannanna heldur einnig á jafnvægið á milli verndunar íslenskrar náttúru og hagnýtingar, þeir geta með framlagi sínu lagt sitt af mörkum í átt að sjálfbærri þróun atvinnugreinarinnar og aukið skilning umheimsins á sérstöðu Íslands, menningu og náttúru.

Menningarlæsi mikilvægt

Leiðsögumenn bera því mikla ábyrgð. Til að geta axlað hana þurfa þeir að vera vel menntaðir og þjálfaðir til að fást við krefjandi verkefni, stundum við erfiðar aðstæður. Veður og aðstæður í íslenskri náttúru geta eins og við vitum breyst á svipstundu og jafnvel orðið stórhættulegar. Þá ríður á að leiðsögumaðurinn sé vel þjálfaður og fagmenntaður og bregðist rétt við í samráði við bílstjóra. Reynsluleysi eða viðvaningsháttur við þær aðstæður geta orðið afdrifaríkar fyrir farþegana og ferðaþjónustufyrirtækið sem í hlut á.

Allir sem vinna í ferðaþjónustunni vita að ferðamenn sem sækja okkur heim koma víðsvegar að úr veröldinni, bakgrunnur þeirra er afar mismundandi og menningarmunur getur verið verulegur. Ég man nokkur dæmi þess að hafa verið með í einni og sömu dagsferðinni fólk af allt að tíu mismunandi þjóðernum. Það er reyndar fremur óvenjulegt, en algengt er að þjóðernin séu tvö eða þrjú. En í öllum tilfellum er mikilvægt að leiðsögumaðurinn sé vel menningarlæs og skilji að til dæmis Japani, Bandaríkjamaður, Frakki og Dani bregðast ekki eins við sömu aðstæðum. Við það bætist svo auðvitað að hver einstaklingur er einstakur. Þetta er meðal þess sem gerir starf leiðsögumannsins í senn snúið og skemmtilegt.

Góð tungumálakunnátta er öryggisatriði

Enskan er okkar annað mál og ágæt til síns brúks svo langt sem hún nær í samskiptum við marga sem hingað koma, hvort sem hún er móðurmál þeirra eða ekki.  Það er hins vegar alls ekki nóg því farþegar sem ekki eru frá hinum enskumælandi heimi hafa tilhneigingu til að ofmeta eigin enskukunnáttu, tala og skilja mismikla ensku, stundum jafnvel litla sem enga. Þá geta nauðsynlegar upplýsingar og fróðleikur farið fyrir ofan garð og neðan, hætta er á misskilningi varðandi tímasetningar og þess háttar. Því skiptir afar miklu máli að í boði séu leiðsögumenn (sjá Félagatal Leiðsagnar: touristguide.is) sem tala einnig önnur tungumál en ensku. Mér er kunnugt um að öll alvöru ferðaþjónustufyrirtæki leitast við að ráða til sín leiðsögumann sem talar móðurmál ferðamannanna, ekki einungis svo að ferðamennirnir njóti ferðarinnar betur í hvívetna heldur einnig til þess að tryggja öryggi þeirra og velferð sem allra best. Auk þess er það oft krafa erlendu ferðaskrifstofanna. Ef eitthvað kemur uppá í ferðinni (veikindi, slys, o.s.frv.) verða öll samskipti að vera skýr og fumlaus og því má sannarlega segja að góð tungumálakunnátta leiðsögumannsins sé ekki einungis spurning um þjónustustig og gæði heldur geti einnig verið lífsnauðsynleg.

Leiðsögn, drifkrafturinn í stéttinni

Leiðsögn, félag leiðsögumanna, er í senn fag- og stéttarfélag. Það var stofnað árið 1972 til að efla samtakamátt og fagmennsku innan stéttarinnar og fagnaði félagið fimmtugsafmæli á síðasta ári með glæsilegri samkomu og veglegu afmælisriti. Eins og allir vita hefur ferðaþjónustan gerbreyst á þessum fimm áratugum, vaxið úr því að vera jaðargrein yfir hásumarið upp í það að vera einn af burðarásum íslensks atvinnulífs allt árið. Hér áður fyrr var starf leiðsögumannsins gjarnan sumarvinna, en undanfarinn áratug eða lengur hefur ferðaþjónustan verið meginlifibrauð hundruða leiðsögumanna mestallt eða allt árið. Nú eru félagar í Leiðsögn hátt í þúsund og starfsemi félagsins öflug. Flestir leiðsögumenn eru faglærðir í leiðsögn og bera sérstakan skjöld á sér því til sönnunar, margir hafa auk þess háskólanám að baki og eru konur í meirihluta.

Nýverið gekk félagið frá skammtíma kjarasamningi við Samtök atvinnulífsins (SA) og Samtök aðila í ferðaþjónustu (SAF) og á næstu mánuðum verður unnið að því að leiðrétta launakjör leiðsögumanna, bæta starfskjör þeirra og færa þau til nútímahorfs.

Við leiðsögumenn, framlínufólkið í ferðaþjónustunni, hlökkum til að þróa ferðaþjónustuna í takt við nýja tíma og vinna ásamt yfirvöldum, Samtökum ferðaþjónustunnar, Ferðamálastofu og fleiri lykilaðilum í ferðaþjónustunni að framþróun og fagmennsku í þessari lykilatvinnugrein á næstu misserum og árum.

Friðrik Rafnsson, formaður Leiðsagnar-félags Leiðsögumanna