Blásið er til kvennaverkfalls nk. þriðjudag, 24. október. Aðstandendur Kvennaverkfallsins í ár eru fjölmörg samtök og félög en óhætt er að segja að félög launafólks fari þar í broddi fylkingar, þar með talið Alþýðusamband Íslands sem Leiðsögn, félag leiðsögumanna á aðild að. Leiðsögn hvetur konur og kvár til að taka þátt hafi þær og þau tök á því. Vegleg dagskrá verður haldin við Arnarhól í miðbæ Reykjavíkur kl. 14.00 en hér neðar má sjá dagskrá víða á landsbyggðinni.

„Þrátt fyrir áratugalanga baráttu búum við enn í samfélagi þar sem langlífasti og útbreiddasti faraldurinn sem við eigum við að etja er kynbundið ofbeldi, ásamt því að framlag kvenna til samfélagsins er gróflega vanmetið. Hver rannsóknin á fætur annarri sýnir fram á sláandi tölur um misrétti og ofbeldi, en viðbrögðin eru lítil sem engin. .. Þrátt fyrir ítrekuð mótmæli og baráttu fyrir jöfnum kjörum höfum við ekki enn náð jafnrétti á Íslandi. Konur lögðu í fyrsta skipti niður störf 24. október 1975 og svo aftur 1985, 2005, 2010, 2016 og 2018, auk þess að blásið var til netherferðar árið 2020 þegar ekki var hægt að koma saman vegna heimsfaraldar. Skipulagning sjöundu mótmælanna stendur nú yfir.“
Af vef um kvennaverkfall 2023

Hér má sjá hvaða samtök standa að kvennaverkfallinu.

Hér má sjá hvaða viðburðir eru í boði út um allt land.