Um framvindu í kjarasamningum

skrifað 24. apr 2019

Hinn 26. mars sl. birti Leiðsögn greinargerð um stöðu og efni samningagerðar sbr. tengil hér í lokin. Framvinda í þeim efnum hefur að hluta mótast og tafist vegna samninga annarra stéttarfélaga. Að gerðum samningum SGS og VR, sem samþykktir voru í dag hófust viðræður að nýju um þau málefni sem getið var í greinargerðinni. Hafa þau þokast til réttrar áttar flest hver þótt enn sé ekki ljóst hve langt verður náð í sambandi við vinnutíma og styttingu vinnuviku. Hefur viðræðunefnd Leiðsagnar nýverið sent viðmælendum svör við tillögum þeirra í því efni og ósk um að viðræðum verði fram haldið.

Ekki hefur verið rætt að ráði um launaliði og í því efni beðið endanlegrar niðurstöðu þegar gerðra samninga og fylgst með horfum hjá iðnaðarmönnum og á opinberum vinnumarkaði. Niðurstaða SGS og VR liggur nú fyrir og þótt vænta megi þess að línur skýrist í þeim efnum á næstu vikum er líklegt að frágangur nýs kjarasamnings leiðsögumanna taki enn nokkurn tíma og að hann muni ekki liggja fyrir fyrr en um eða eftir miðjan næsta mánuð.

Hér má sjá helstu efnisatriði yfirstandandi kjaraviðræðna