Jón R. Hjálmarsson - andlát

Jón R. Hjálm­ars­son, einn af stofnendum Félags leiðsögumanna 1972 og heiðursfélagi Leiðsagnar, lést í dag, 12. nóvember 2018. Jón fædd­ist 28. mars 1922 í Vest­ur­dal í Skagaf­irði. Að loknu bú­fræðiprófi, stúd­ents­prófi, cand. mag.-prófi í ensku, þýsku og sögu og cand. phi­lol.-prófi í sagn­fræði gerðist Jón skóla­stjóri í Skóg­um og síðar á Selfossi þar til hann varð fræðslu­stjóri á Suður­landi til starfs­loka. Auk annarra starfa sinnti Jón alla tíð margvislegum verkefnum á vetvangi menningar, sögu, þjóðfræða og ferðamennsku auk þess að stunda leiðsögn, sem hann gerði al­veg fram á síðastliðið ár. Eftir hann liggja bæk­ur um sagn­fræði og þjóðleg­an fróðleik af ýms­um toga sem margar hverjar eru leiðsögumönnum notadrjúgar. Á aðalfundi Leiðsagnar 2017 var ákveðið að gera Jón R Hjálmarsson að heiðursfélaga. Af því tilefni var honum afhent svohljóðandi heiðursskjal:

                                            Jón R. Hjálmarsson
                           Heiðursfélagi Leiðsagnar - félags leiðsögumanna

Leiðsögn - félag leiðsögumanna gerir með bréfi þessu Jón R. Hjálmarsson að heiðursfélaga sínum.

Jón R. Hjálmarsson var einn af stofnendum Félags leiðsögumanna árið 1972 og hefur alla tíð verið vinsæll og fjölkunnugur leiðsögumaður, búinn einstökum hæfileikum til að miðla öðrum af ríkulegri þekkingu á sögu, menningu og náttúru landsins.

Auk starfa sem skólastjóri Héraðskólans að Skógum undir Eyjafjöllum og Fræðslustjóri Suðurlands vann Jón alla tíð að verkefnum sem tengjast ferðamennsku. Hann lagði uppbyggingu Byggðasafnsins að Skógum drjúgt lið og stóð að ritun og útgáfu á verkum um sögu og menningu héraðsins. Ritstörf Jóns á sviði sagnfræði og þjóðfræði eru víðkunn og verk hans eru leiðsögumönnum uppspretta fróðleiks og hugmynda.

Leiðsögn - félagi leiðsögumanna er heiður að því að hafa Jón R. Hjálmarsson innan sinna vébanda og samþykkti einróma á aðalfundi sínum 10. apríl 2017 að gera Jón R. Hjálmarssona að heiðursfélaga.