Á málþingi  Landsbankans , Íslandsstofu  og Iðnaðarráðuneytisins  sem haldið var í Reykjavík  25. janúar 2012 kom fram í máli Jóns Ásbergssonar  framkvæmdastjóra  Íslandsstofu að  miðað við þá aukningu í komu ferðamanna  hingað til lands sem verið hefur undanfarin ár, mætti jafnvel búast við því að árið 2015   kæmi hingað ein milljón erlendra ferðamanna.

Hann sagði jafnframt að þetta gæti orðið til þess að leysa mörg þeirra vandamála sem okkar litla samfélag  býr við í dag.  Ennfremur kom fram í máli hans að arðsemin  innan ferðaþjónustunnar væri ekki nógu góð og þar væru ýmsir flöskuhálsar.

   Í skýrslu Landsbankans  sem lögð var fram á málþinginu  kom fram að  á árunum 2000 til 2011 fjölgaði ferðamönnum í Evrópu  um 30%, en á sama tíma fjölgaði þeim í heiminum öllum um 45 %. Á Íslandi  var þróunin hinsvegar allt önnur og örari , því hér fjölgaði ferðamönnum á þessu árabili um heil 85 % og mun vera leitun að öðru landi þar sem fjölgun ferðamanna hefur orðið  eins mikil.

Talið er að  árið 2020 verði ferðamenn í  heiminum   um 1200 milljónir , þar af um 700 milljónir í Evrópu.

skrifstofa/kj